Bures boahtin Sámi Arkiivii!

Duogaš

Lei guhká leamašan dárbu Sámi dutkanarkiivii. Sámi arkiivvat-prošeakta álggahuvvui 1988:s, ja lei NAVF (Norges almenvitenskapelige forskningsråd), Sámi Instituhta ja Arkivverket:a ovttasbargoprošeakta mas lei ulbmil sihkkarastit sámi historjjá gálduid. Sámi arkiiva-vuođđudus ásahuvvui ođđajagimánu 1.b. 1995. Ođđajagimánu 1.b. 2005 rájes válddii Riikkaarkivára badjelasas hálddašanovddasvástádusa Sámi arkiiva-vuođđudusas.

Sámi Arkiiva lea dál oassin Arkivverket-doaimmahagas Norggas ja ruhtaduvvo stáhtabušeahta bokte. 

Arkiivaportála ja arkiivasisdoallu

Sámi Arkiivvas gávdnojit sihke priváhtaarkiivvat ja almmolaš ásahusaid arkiivvat. Eanaš arkiivvat leat gávdnamis ohcanbálvalusa Arkivportalen bokte.

Sámedikki, Sámi allaskuvlla, Guovdageainnu suohkana arkiivvat leat deponerejuvvon Sámi arkiivii. Jus leat jearaldagat daid arkiivvaid birra, de sáhtát váldit oktavuođa njuolga eaiggátásahusain.

Nuohtti – Sámi arkiivamateriálaid ohcanportála. Dáin portálain sáhtát ohcat ja bláđet arkiivamateriálaid, mat laktásit sápmelaččaide, miehtá Eurohpa.
 

Arkiivvaid deponeren ja skeŋken

Go deponeret dahje skeŋket materiála arkiivii čállojuvvo šiehtadus gos sihke arkiivaaddi ja arkiivaásahusa vuoigatvuođat ja geatnegasvuođat bohtet ovdan.  

Váldde oktavuođa minguin

Váldde áinnas oktavuođa minguin jus dus lea materiála mas livččii dehálaš váldit vára boahtteáigái! Dat sáhttet leat filmmat, govat, reivvet, beaivegirjjit, priváhtaolbmuid dahje servviid arkiivvat, báddemat luđiin, sálmmain, sártniin dahje eará. Mii sáhttit nai vurket dokumentašuvnna mii lea vurkejuvvon omd. CD-hámis, dáhtafiilan, digitála govvan dahje sullasažžan. 

Mii eat vástit gažaldagaid sogaid birra sohkadutkama oktavuođas. Jus háliidat dieđuid sohkadutkama birra sáhtát gávdnat dieđuid neahttasiiddu ovdasiiddu bokte. 

Jus leat gažaldagat opmodagaid birra lea dehálaš dieđihit dállonummára dahje geavahusnummára, ja suohkana. Sáhtát nai lohkat eanet opmodaga birra arkiivadoaimmahaga neahttasiidduin mat leat justte dan birra.

Čujuhus

Sámi Arkiiva
Hánnoluohkká 45
9520 Guovdageaidnu

Telefovdna: +47 480 55 666

E-poasta: [email protected] 

Galledančujuhus: Diehtosiida 2.d. 
(+47 78 44 84 00)